Follow by Email

2015, ജൂൺ 15, തിങ്കളാഴ്‌ച

തുരുത്ത്



ഒരിക്കൽ ഒരു നാട്ടിൽ,
നിഷ്കളങ്കതയിൽ മിഴികൾ വിടർത്തി നോക്കുന്ന 
ഒരു വെളുത്തസുന്ദരിക്കുട്ടിയുണ്ടായിരുന്നു 
എപ്പോഴും തിരക്കുപിടിച്ചു കളികളിൽ രസിച്ചു 
സ്വയം മറന്നിരിക്കുന്ന അവളെ അമർത്തി ഉമ്മ വെച്ച് 
ദേഷ്യം പിടിപ്പിക്കുന്ന മറ്റൊരു പെണ്‍കുട്ടിയും 

അവർക്കിടയിൽ സ്നേഹം എന്നത് വഴക്കുകളും 
പിണക്കങ്ങളും ഇണക്കങ്ങളും പൊട്ടിച്ചിരികളും മാത്രം 
കൗമാരത്തിൽ പിരിയാത്ത സൗഹൃദമായിരുന്നു സ്നേഹം 
അടക്കം പറച്ചിലുകളിലേക്ക് വഴിമാറിയ അടക്കിപിടിക്കലുകൾ;

പക്ഷെ കാലം മെരുക്കിയെടുത്ത യൗവനത്തിൽ 
അവരിലൊരാൾ ഒറ്റപ്പെട്ട ഒരു തുരുത്തായി രൂപാന്തരപ്പെട്ടു 
എന്തിൽ  നിന്നൊക്കെയോ രക്ഷപെടാനുള്ള വ്യഗ്രതയിൽ 
രാജ്യവും പരിവാരങ്ങളും അകലങ്ങളിൽ ഉപേക്ഷിച്ചു 
ആർക്കും എത്തിപ്പെടാൻ പറ്റാത്തൊരു തുരുത്തായി 
എല്ലാവരാലും എതിർക്കപ്പെട്ടു ജീവിച്ചു പോന്നപ്പോൾ 
 മറ്റേയാളാവട്ടെ  എല്ലാവരാലും വാഴ്ത്തപെട്ട 
ഒരു നാട്ടുരാജ്യമായി ക്രമേണ രൂപം മാറി 

 തുരുത്തിലെക്കുള്ള വഴി മുറിഞ്ഞു പോയതിനാൽ 
ശിഷ്ടകാലം ഒരു കൂടിച്ചേരൽ സാദ്ധ്യമോ 
എന്ന ആകുലത ബലപ്പെട്ടിരിക്കുന്നു 
പുതിയ വഴികൾ നിർമ്മിക്കാൻ താൽപര്യമില്ലാത്തതു  കൊണ്ടും 
ഇനിയൊരു തിരിച്ചു വരവിനുള്ള  സാധ്യത തുലോം 
കുറവായതു കൊണ്ടും അവർ തമ്മിൽ ഒരു സംഗമം
 അസാദ്ധ്യം എന്നുള്ളതാണ് കഥാന്ത്യം...........








അഭിപ്രായങ്ങളൊന്നുമില്ല:

ഒരു അഭിപ്രായം പോസ്റ്റ് ചെയ്യൂ