Follow by Email

2015, ഏപ്രിൽ 17, വെള്ളിയാഴ്‌ച

എതിർ ദിശയിൽ തുഴയുന്നവർ




നമ്മൾ ഒരേ തോണിയിൽ മുഖം തിരിഞ്ഞിരുന്നു
എതിർ ദിശയിലേക്ക് തുഴഞ്ഞു കൊണ്ടേ ഇരിക്കുന്നു...
വർഷങ്ങളായി ...
എങ്കിലും തോണി മുങ്ങിപോകാതിരിക്കാൻ
 നാം നന്നായി പരിശ്രമിക്കുന്നു...

എൻറെ മൗനം, അജ്ഞത എന്നു വ്യാഖ്യാനിച്ചു നിങ്ങൾ
വിജയത്തിന്റെ കൊടുമുടികൾ കയറുന്നു
നിങ്ങളുടെ പാണ്ഡിത്യത്തിനു മുന്നിൽ കുറ്റസമ്മതം നടത്തി;
ഞാൻ വരി വെച്ചു പോകുന്ന ഉറുമ്പുകളെ എണ്ണി പഠിക്കുന്നു

എങ്കിലും...
 നിങ്ങൾ എന്താണിത്ര അസഹിഷ്ണു ആവുന്നത്?
ഒരു നിമിഷത്തിന്റെ ആനുകൂല്യം തന്നിരുന്നെങ്കിൽ
ചിലപ്പോ നമ്മൾ ഒന്നിച്ചു തുഴഞ്ഞു
ഒരു തീരം അണയുമായിരുന്നു

നിങ്ങൾ ഓർക്കുന്നുണ്ടോ?
 നമ്മൾ പാഴാക്കിയ നീണ്ട വർഷങ്ങളെ?
നാം തിന്നു തീർത്ത നിശബ്ദത?
ചിരികളിൽ പൂട്ടിയിട്ട സൗഹൃദവാക്കുകൾ?

ഒരുമിച്ചു നടന്ന സായാഹ്നങ്ങളിൽ
ഒലിച്ചു പോയ വിലപ്പെട്ട മൊഴിമുത്തുകൾ?
ആരൊക്കെയോ അവ പെറുക്കി കൂട്ടി ലേലത്തിനു വിറ്റെന്ന്
നിങ്ങളാണ് എന്നോട്പറഞ്ഞത്...
ഒരു കുറ്റപ്പെടുത്തലിൽ പൊതിഞ്ഞു....

എൻറെ  പാതി എപോളും പറയാറുണ്ട്;
നിങ്ങളൊരു അവസരവാദി യാണെന്ന്‌..
അവൻ പറഞ്ഞതൊന്നും ഇന്ന് വരെ തെറ്റിയിട്ടില്ല;
എങ്കിലും തെറ്റിപ്പോകാൻ ഞാൻ കൊതിക്കാറുണ്ട്...

ഈ നഷ്ടങ്ങൾക്കൊക്കെ ഞാൻ പകരം കൊടുക്കേണ്ടി വരുന്നത്
എൻറെ ജീവിതമാണെങ്കിൽ..
നിങ്ങളീ തോണി മുങ്ങാതെ മാത്രം നോക്കുന്നത്?

അഭിപ്രായങ്ങളൊന്നുമില്ല:

ഒരു അഭിപ്രായം പോസ്റ്റ് ചെയ്യൂ