Follow by Email

2015, ഫെബ്രുവരി 17, ചൊവ്വാഴ്ച

എന്റെ മൗനം

എന്റെ മൗനം;
പെയ്തൊഴിയാത്ത  തുലാവർഷ മേഘം പോലെ,
ഇരുൾ മൂടിയ വാനത്തിന്റെ 
കോണിലെവിടെയോ പതുങ്ങി നിന്നു;
എനിക്കും നിനക്കുമിടയിൽ അകലം തീർത്തു
അത് പടർന്നു വളർന്നു കൊണ്ടേ ഇരുന്നു....


എന്റെ മൌനം;
ദിക്കറിയാതെ പറക്കുന്ന പക്ഷിക്കൂട്ടം പോലെ
ഏതൊക്കെയോ വിലക്കപ്പെട്ട 
ചില്ലകളിൽ കൂടുകൂട്ടി ഊരുതെണ്ടുന്നു
നിന്റെ നിസ്സംഗതക്ക് മുൻപിൽ 
ഒരു കുറ്റവാളിയെ പോലെ
തലകുമ്പിട്ടു നില്ക്കുന്നു...


എന്റെ മൌനം;
ഒരു ഭ്രാന്തന്റെ മനസ് പോലെ
എന്തൊക്കെയോ സങ്കല്പ്പിച്ചു 
വിലപിച്ചു കൊണ്ടേ ഇരിക്കുന്നു...
നിനക്ക് ഗ്രഹിക്കാനാവാത്ത 
വിശ്വാസ പ്രമാണങ്ങളിലൂടെ
അവ ഏകാന്തയാത്ര നടത്തുന്നു....

എന്റെ മൌനം;
അത് നിന്റെ  തോൽവിയാണ്..
ഉള്ളിലെ ചിത കെട്ടടങ്ങും വരെ
അതിനെ എനിക്ക് സ്വച്ഛമായി അലയാൻ വിടണം.....

അഭിപ്രായങ്ങളൊന്നുമില്ല:

ഒരു അഭിപ്രായം പോസ്റ്റ് ചെയ്യൂ